وانا قاعد مع نفسى ساعات بفكر ليه انا وانتوا واحنا كده سلبيين للدرجه دى . هل المواطن المصرى مكسور للدرجه دى لدرجة انه بقى زى الحيوان اللى مش بيدور غير على حاجاته الفسيولوجيه وخلاص بيدور على أكله وشربه ولبسه وبيت يقعد فيه وخلاص .

انا لما بشوف نمط حياة كل واحد فينا بحس بالظبت اننا زى الحيوانات ملناش من البلد دى غير شوية اكل وشرب ومكان نعيش فيه وده بينطبق على كل المستويات الإجتماعيه والطبقات فقيره ومتوسطه وغنيه .

كل واحد بيقول وانا مالى انا مالى مال اللى بيحصل فى البلد . تتسرق تتنهب تتحرق انا مليش دعوه انا قدم انا عايش وخلاص . هو انا اللى هغير البلد وحالها يعنى .

انا دلوقتى بس اقدر اشبه مجتمعنا بمنجم فحم .. صاحب المنجم هو المسؤلين فى مصر واحنا العمال اللى شغالين فى المنجم

صاحب المنجم والمساعدين Don't care بالعمال وهمه انه يفضل صاحب المنجم مش مهم المنجم يتهد على العمال او العمال يجي لهم امراض او يموتوا وصاحب المنجم سايب كل حاجه للمساعدين بتوعوا وهو عارف انهم حرامية وبيسرقوه وبيظلموا العمال .. لكن هو منفض او عامل نفسه مش واخد باله .

ياترى هل هيجى اليوم اللى نشوف مصر بلد بتحترم المواطن سواء فى صحه او اكل او شرب او مواصلات او تعليم او شغل او حرية او سياسة ؟

انا شايف ان الأكل مزروع بمياه صرف صحى وكله كيماويات ومسرطنات والشرب المياه كلها كلور بكميات ضخمه بدل اما تموت الجراثيم هتموتنا احنا وتجيب لنا الامراض ..

المواصلات احنا شايفين السكه الحديد بمعدل كل اسبوع3 حوادث على الاقل والأتوبيسات لا تصلح للاستهلاك الآدمى والتاكسيات مش كل الناس تقدر تركبها كوسيلة مواصلات اساسية وكمان فى اوقات الزحمه صعب تلحق تاكسى فاضى .

التعليم ماشاء الله يعنى بدون حسد مستواه كل يوم فى النازل واللى ماسكين التعليم ولا عارفين هما بيعملوا ايه شوية هنخلى المرحلة كذا 3 سنين لا هنخليها 4 والإبتدائى هنخليه 5 لا خلاص خليه 6 والمناهج شيل الحته دى والسنه الجايه رجعها تانى والغلطات فى المناهج سيبك انت محدش واخد باله .. والمناهج اللى من ايام الكفار .. سيبك انت محش واخد منها حاجه والسيستم بتاع التعليم كله بايظ وزى الزفت .

الصحه . الحمد لله عندنا نخبه من الدكاتره اللى مش عارفه اى حاجه فى اى حاجه وتروح للدكتور يكتب لك الدواء اللى مندوبين شركات الادويه بيروجوا له . مش مهم اذا كان الدواء ده هو الفعال ولا لا او مش مهم اذا كان هيجيب لك امراض منيله

المهم انه يحقق هو ودكاتره تانين نسبة مبيعات عالية من الدواء ده علشان يطلعوا مؤتمرات وياخدوا هدايا واجهزه طبيه مجانا

وياسلام بقى لو روحت لدكتور تانى علشان تتأكد انك ماشى فى العلاج صح .. يقولك ايه ده ايه ده ارمى كل الدواء اللى دكتور كذا مديهولك انت معندكش كذا . ده انت عندك حاجه تانيه خالص ... انا عاوز تروح تعمل اشعه وتحاليل كذا وكذا ... ويقولك متعملهاش عند اى حد اعمله فى معمل كذا .. علشان سيادته بياخد نسبه لما بيعرفوا انه هو اللى باعتك

ادوية كتيره مستورده الدوله بتقلل استيرادها وبتوقفها فى بعض الاحيان وبيقولوا فيه بديل مصرى ولاسف البديل المصرى الماده الفعاله فيه معدومه يعنى اخد الدواء زى قلته .. والمشكله انها بتكون امراض مسألة حياة او موت

شغل بقى سيبك انت تبقى شاب زى الفل كده وكلك حيويه ونشاط ومستعد تكسر الدنيا وتلاقى الاحباط فى الشغل جايلك من كل ناحية . اى وظيفه هتروح تشتغلها هتلاقى روتين وشوية معاتيه ماسكين المكان اللى انت بتشتغل فيه سواء كان خاص او حكومى

وشغلك بقى بمرتبات تعبانه اخر حاجه . فهتلاقى نفسك مضطر لإنك تشتغل شغلانه تانيه 

حرية بقى سيبك انت وتخيل انت بقى سيناريو الإنتخابات والاحزاب وتعبيرك عن رايك وهل حد بياخد برأيك لما يكون رأى اغلبيه

وعلشان مكونش ناقد سلبى بس لازم اقول نقطه ايجابيه لاحظتها فى مجال الحريه .. حاليا متاح للتلفزيون تتجاوز معظم الخطوط اللى كانت ممنوعه قبل كده وفيه تطور شوية فى مجال الحريه وكمان المواقع على النت

وإلا كان زمانى دلوقتى اختفيت من البلد قبل اما اعمل نشر للموضوع ده :) .. لكن برده فيه قيود على الحرية وفيه تجاوزات بتحصل لحد دلوقتى فى مصر .