وانا قاعد مع نفسى ساعات بفكر ليه انا وانتوا واحنا كده سلبيين للدرجه دى . هل المواطن المصرى مكسور للدرجه دى لدرجة انه بقى زى الحيوان اللى مش بيدور غير على حاجاته الفسيولوجيه وخلاص بيدور على أكله وشربه ولبسه وبيت يقعد فيه وخلاص .

انا لما بشوف نمط حياة كل واحد فينا بحس بالظبت اننا زى الحيوانات ملناش من البلد دى غير شوية اكل وشرب ومكان نعيش فيه وده بينطبق على كل المستويات الإجتماعيه والطبقات فقيره ومتوسطه وغنيه .

كل واحد بيقول وانا مالى انا مالى مال اللى بيحصل فى البلد . تتسرق تتنهب تتحرق انا مليش دعوه انا قدم انا عايش وخلاص . هو انا اللى هغير البلد وحالها يعنى .

انا دلوقتى بس اقدر اشبه مجتمعنا بمنجم فحم .. صاحب المنجم هو المسؤلين فى مصر واحنا العمال اللى شغالين فى المنجم

صاحب المنجم والمساعدين Don't care بالعمال وهمه انه يفضل صاحب المنجم مش مهم المنجم يتهد على العمال او العمال يجي لهم امراض او يموتوا وصاحب المنجم سايب كل حاجه للمساعدين بتوعوا وهو عارف انهم حرامية وبيسرقوه وبيظلموا العمال .. لكن هو منفض او عامل نفسه مش واخد باله .

ياترى هل هيجى اليوم اللى نشوف مصر بلد بتحترم المواطن سواء فى صحه او اكل او شرب او مواصلات او تعليم او شغل او حرية او سياسة ؟

انا شايف ان الأكل مزروع بمياه صرف صحى وكله كيماويات ومسرطنات والشرب المياه كلها كلور بكميات ضخمه بدل اما تموت الجراثيم هتموتنا احنا وتجيب لنا الامراض ..

المواصلات احنا شايفين السكه الحديد بمعدل كل اسبوع3 حوادث على الاقل والأتوبيسات لا تصلح للاستهلاك الآدمى والتاكسيات مش كل الناس تقدر تركبها كوسيلة مواصلات اساسية وكمان فى اوقات الزحمه صعب تلحق تاكسى فاضى .

التعليم ماشاء الله يعنى بدون حسد مستواه كل يوم فى النازل واللى ماسكين التعليم ولا عارفين هما بيعملوا ايه شوية هنخلى المرحلة كذا 3 سنين لا هنخليها 4 والإبتدائى هنخليه 5 لا خلاص خليه 6 والمناهج شيل الحته دى والسنه الجايه رجعها تانى والغلطات فى المناهج سيبك انت محدش واخد باله .. والمناهج اللى من ايام الكفار .. سيبك انت محش واخد منها حاجه والسيستم بتاع التعليم كله بايظ وزى الزفت .

الصحه . الحمد لله عندنا نخبه من الدكاتره اللى مش عارفه اى حاجه فى اى حاجه وتروح للدكتور يكتب لك الدواء اللى مندوبين شركات الادويه بيروجوا له . مش مهم اذا كان الدواء ده هو الفعال ولا لا او مش مهم اذا كان هيجيب لك امراض منيله

المهم انه يحقق هو ودكاتره تانين نسبة مبيعات عالية من الدواء ده علشان يطلعوا مؤتمرات وياخدوا هدايا واجهزه طبيه مجانا

وياسلام بقى لو روحت لدكتور تانى علشان تتأكد انك ماشى فى العلاج صح .. يقولك ايه ده ايه ده ارمى كل الدواء اللى دكتور كذا مديهولك انت معندكش كذا . ده انت عندك حاجه تانيه خالص ... انا عاوز تروح تعمل اشعه وتحاليل كذا وكذا ... ويقولك متعملهاش عند اى حد اعمله فى معمل كذا .. علشان سيادته بياخد نسبه لما بيعرفوا انه هو اللى باعتك

ادوية كتيره مستورده الدوله بتقلل استيرادها وبتوقفها فى بعض الاحيان وبيقولوا فيه بديل مصرى ولاسف البديل المصرى الماده الفعاله فيه معدومه يعنى اخد الدواء زى قلته .. والمشكله انها بتكون امراض مسألة حياة او موت

شغل بقى سيبك انت تبقى شاب زى الفل كده وكلك حيويه ونشاط ومستعد تكسر الدنيا وتلاقى الاحباط فى الشغل جايلك من كل ناحية . اى وظيفه هتروح تشتغلها هتلاقى روتين وشوية معاتيه ماسكين المكان اللى انت بتشتغل فيه سواء كان خاص او حكومى

وشغلك بقى بمرتبات تعبانه اخر حاجه . فهتلاقى نفسك مضطر لإنك تشتغل شغلانه تانيه 

حرية بقى سيبك انت وتخيل انت بقى سيناريو الإنتخابات والاحزاب وتعبيرك عن رايك وهل حد بياخد برأيك لما يكون رأى اغلبيه

وعلشان مكونش ناقد سلبى بس لازم اقول نقطه ايجابيه لاحظتها فى مجال الحريه .. حاليا متاح للتلفزيون تتجاوز معظم الخطوط اللى كانت ممنوعه قبل كده وفيه تطور شوية فى مجال الحريه وكمان المواقع على النت

وإلا كان زمانى دلوقتى اختفيت من البلد قبل اما اعمل نشر للموضوع ده :) .. لكن برده فيه قيود على الحرية وفيه تجاوزات بتحصل لحد دلوقتى فى مصر .

كنت بتصفح اخبار الدنيا اللى تجيب الشلل وترفع الضغط وتجيب إكتئاب لاقيت خبر مستفز جدا عن ماما حسنى قصدى بابا حسنى ربنا يخليه للشعب طويل العمر يطول عمره ويقصر من عمر الشعب ويزود فى عمره ياقادر ياكريم ... احنا هنشحت ولا ايه خلاص نتكلم جد 

شوفت خبر مستفز ان سيادة الرئيس بجلالة قدره قلبه حن على شوية مواطنين ووزع عليهم 40.000 كارتونه فيها مستلزمات رمضان وكمان 100 جنيه لكل مواطن والغريب ان الخبر بيقول سيادة الرئيس عمل وسيادة الرئيس وزع .. لكن سيادة الرئيس جاب الفلوس منين !

الخبر كله شكر ومدح فى سيادة الرئيس وكأن اللى عمله ده من فلوسه الخاصه ... لو من فلوسه الخاصه ممكن نقول ماشى هيا تمشى برده ... لكن ده هيطرح سؤال هو الريس مرتبه كام ولو افترضنا انه 2 مليون فى الشهر استحاله هيعمل حاجه زى كده من جيبه الخاص

يبقى اللى حصل ده حصل بفلوس الدوله اللى هيا فلوس الشعب يعنى فلوسنا احنا والحكومه دى شغاله عندنا احنا الشعب لان احنا اللى اختارناها تشتغل عندنا .. وبالتالى لما سيادة الرئيس ياخد من فلوس الشعب ويوزع او يعمل خير يبقى مش محتاج نقعد نمدح فيه

كتير بنشوف موظفين فى وظايف حكومية بالنسبه له الوظيفه الحكومية حاجه بدون قيمة لان مرتبها قليل وفى نفس الوقت هيا الكنز لمصدر فلوس ضخم ممكن يجى له من وراها 

مثال مثلا المدرس والدكتور كأبسط مثال وياسلام لو صاحب الوظيفه دى كان شخص معندهوش ضمير وهمه الاكبر انه يشغل الدروس الخصوصية علشان يلحق يغير العربيه فى نص السنه او دكتور عاوز يخلى العياده الخاصه بالليل طوابير طوابير 

تلاقى المدرس بيقول للطالب لما يروح المدرسه انتا بتروح ليه ولما يجى يشرح ده لو شرح تلاقيه بيشرح اى كلام ولو عرف انك بتاخد عند مدرس تانى يقعد يطلع فيه عيوب الدنيا والآخره رغم ان انتا مثلا تكون بتاخد عند مدرس او مدرسة عندهم 60 سنة وخبره فى الماده وهو لسه شاب مش عدى 25 سنه ويقعد يسالك المدرس بتاعك بياخد منك كام وبعدين يقولك ياه ده غالى اوى ده انا رحيم وبدى نص الثمن ده ... يعنى سيادته شغال فى المدرسه دراكولا بيصطاد الطلبه علشان ياخدوا درس عند سيادته وممكن كمان يستقصد طالب فى اعمال سنه والطالب اما يعرف ان اصحابه اللى بياخدوا عند المدرس ده بياخدوا درجات اعمال سنه كامله فيكون لازم هو كمان يروح ياخد عنده علشان يعرف يجمع كام درجه اخر السنه 

حد سمع قبل كده عن الأب الروش طحن ! .... هقولك تعرفه ازاى ده ..لما تلاقى اب ماشى مع ولاده لابس سلسة دهب وصابغ شعره لان طلع له كام شعره بيضاء وهو مصمم انه لسه شاب .. لما تلاقيه ماشى فى الشارع عمال يقول لدى ياجميل انتا ماتيجى اوصلك 

وعمال يعاكس فى بنات فن سن ولاده .. لما تلاقيه بيعمل شاتنج مع سوزى من لبنان وشاليا من امريكا وعمال يحب فيهم وهو متجوز

لما تلاقيه ساعة الصلاه نايم وولاده نازلين يصلوا .. واكيد بنسبة كبيره فى المستقبل هيبقوا زيه 

إمبارح كنت فى مشوار بالليل ووانا ماشى فى الشارع لاقيت 2 ماشين وواحد منهم بيقول لتانى "علشان أبوك يخاف ويكش منك"

وبعد كده ملحقتش اسمع حاجه .. هنا بقى انا اتصدمت من الكلمه لان فكرتها اول مره اسمعها 

ان الأب يخاف من إبنه وابنه يربى له الرعب !!! مش فاهمها دى 

زمن ايه ده ياربى ... الكلام ده على مااعتقد هو اللى ممكن يكون بيتسبب فى حالات ان الابن يقتل ابوه او امه او العكس 

بس برده مش فاهم .. يعنى الأخ ده هيعمل ايه علشان ابوه يخاف ويكش منه ؟ هيروح يطلع له المطوه يعنى ولا هيهدده انه هيرميه من البلكونه ولا الفكره ماشيه ازاى 

كفايه كده علشان بجد مش لاقى تعليق او كلام اقوله اكتر من كده ... وأشوفكم فى تدوينه تانيه .

مجتمعنا المصرى مزيج من كل الناس والطبقات والإتجاهات والتناقضات والايجابيات جنب السلبيات والفقراء جنب الاغنياء وناس بتموت من الجوع جنب ناس بترمى الاكل كل ليله من الحفلات 

شاب ماشى بيعاكس بنات وشاب تانى ماشى وشه فى الأرض ومطول دقنه 

بنت ماشيه نسيت تكمل لبس هدومها وبنت مش باين حتى لون جزمتها 

كل انسان جواه الخير والشر والانسان خلال ساعه واحده ممكن حاله ينقلب من الصح للغلط او من الغلط للصح 

كتير بنلاحظ ان اصحاب محلات وشركات هم من اصحاب الدقون .. اول اما الواحد بيدخل المحل او الشركه بيكون سعيد ومطمن لانه هيتعامل مع واحد امين ومش هيضحك او ينصب عليه 

اكتر 3 حاجات بنهتم بيه فى حياتنا فى العصر الحالى الإنترنت والتلفزيون والمجلات والصحف معظمنا بيستخدم الحاجات دى كويسيله لتسلية وقت الفراغ وناس تانيه قاصده تستعملها كوسيلة للثقافه وناس تانيه بتستعملها كوسيلة ترفيه سريعه بعد يوم عمل شاق 

لكن اثناء الاستخدام ده بيقابل الشخص او المستخدم معلومات فى كل دقيقه وكل لحظه .. ياترى الشخص شايف المعلومات دى ازاى !

فيه دراسات كتير اتعملت واثبتت ان معظم الناس بتعتبر المعلومات المقدمه ليهم فى التلفزيون هيا معلومات صحيحه وبدون شعور من كتر تفاعلهم مع التلفزيون بينسوا ان فيه احتمال ان المعلومات دى ممكن تكون غلط او مشوشه لصالح ناس او جهات معينه 

كل يوم بفكر واقول ياترى هل الريس هيكمل الفتره الحاليه بتاعة الرئاسه ولا هيحصل تغيرات تفاجئ كل المصريين زى وفاة الريس بعد الشر يعنى وربنا يطول لنا فى عمره ويقصر من عمرنا ويدى له علشان نضيف الهرم الرابع لمصر 

نتكلم جد ... تخيل لو صحيت الصبح بتشغل التلفزيون لاقيت كل القنوات بتذيع خبر وحدث واحد وهو وفاة سيادة الرئيس 

ايه اول شعور هتشعر بيه هل اول حاجه هتفتكرها الانجازات ولا الإخفاقات هل هتفرح ولا هتزعل 

انا عن نفسى بنظر للريس بطل بكل المقايس وخلال الفتره بعد الحرب قدر يمسك البلد كويس ويحفظها من انقلابات معينه كانت ممكن تحصل ... بس فى نفس الوقت انا مش مع ان يمسك البلد واحد من الجيش 

على الحرام من دينى .. كلمه للاسف بسمعها كل يوم فى اماكن مختلفه ومن ناس فى اعمار مختلفه

من كذا سنه كنت بسمع الكلمه عادى ومش فى دماغى لحد اما فى مره سمعتها وانا ماشى فضلت تتكرر فى دماغى وقعدت اقول هو معناها ايه حسيت ان المقصود بيها ان الشخص اللى بيحلف ده بيقول انا هعمل كل حاجه حرام الإسلام حرمها لو كذا حصل او لو انا معملتش كذا

YouTube has just enabled a new feature that allows users to directly share their recently uploaded videos to Facebook, Twitter, and Google Reader. This means you’ll be able to syndicate your newly uploaded content directly into your friends’ feeds. You can link your accounts on YouTube’s ‘Upload’ page.