كل كائن حى لية ساعة بيلوجية بمعنى ان كل وقت ولية مزاج ونشاط معين يعنى الخفاش مثلا بينشط باليل وينام الصبح . الانسان بردة لية ساعة بيلوجية على مدار ال24 ساعة اليومية فى اوقات بيبقى الواحد مركز اوى وفى اوقات بيبقى الواحد مسقط اوى وفى اوقات بيبقى الواحد عايز ينام واقات تانية بيبقى مش عارف ينام . اللى بيحصل هنا ان الجسم بيفرز هرمونات معينة فى اوقات معينة فبيتحكم فى مزاج ونشاطات الانسان يعنى مثلا الاحساس بالجوع وقت الفطار والاحساس بالنوم باليل . الكلام دة اصلا لو احنا منظمين وقتنا وبناكل بميعاد وبنام بميعاد وبنلعب بميعاد وبنتفرج على التلفزيون بميعاد وبما ان الامتحانات قربت فأنا هتكلم عن احسن اوقات للمذاكرة طبقا للساعة البيلوجية للأنسان .. الدراسات اكدت أن الساعة التاسعة صباحاً هي التوقيت الأفضل لمراجعة المواد والدروس قبل التوجه إلى الامتحانات حيث يكون أداء الذاكرة قصيرة المدى في أفضل حال.

والمعروف أن عمل الدماغ يكون نشطاً بين العاشرة صباحاً والواحدة قبل الظهر وأن مستوى الأدرينالين يكون مرتفعاً في هذا التوقيت لذلك تتوفر خلاله الظروف الأفضل للتفكير بالعمليات المعقدة وإنجاز العمليات الجراحية.
وأظهرت الدراسة أيضا أن أداء الجسم ينخفض في الساعة الواحدة من بعد الظهر لذا تظهر الحاجة إلى التقاط الأنفاس وتعتبر الساعة الثالثة من بعد الظهر الساعة الأفضل للقيام بالأعمال التي لا تتطلب تركيزاً مثل تصنيف الأوراق والوثائق، في حين تعتبر الساعة الرابعة مثالية للقيام بالنشاطات الرياضية المختلفة لذلك لا يعتبر تحقيق أغلب الأرقام القياسية فترة بعد الظهر من قبيل المصادفة.

ويعتبر الوقت الواقع بين السادسة والثامنة مساء الوقت الأفضل لحفظ المعارف في الذاكرة، ويصبح أداء الجهاز الهضمي أكثر بطءا عند الساعة الثامنة مساء لذلك توصي الدراسة بتناول وجبات خفيفة من الطعام، وينصح العلماء بعدم القيام بعمليات تفكير كبيرة معقدة بعد الساعة الثامنة مساء بسبب الزيادة في هرمون "ميلاتونين" الذي يقوم بتهدئة الدماغ وتحضيره للنوم.

اذن الواحد ايام الامتحانات لازم ينظم وقتة ويذاكر
1- من الساعة 9 صباحا الى 1 الظهر الحاجت اللى عايزة فهم
2- من الساعة 1 الى 3 عصرا ينام شوية
3 - من الساعة 3 الى 4 عصرا ينظم الورق بتاعة ويشوف اية اللى ناقص وكدة
4- من الساعة 4 الى 6 يتفرج على التلفزيون ويعمل شوية تمارين رياضية ويلع بلاى ستاشن
5- من الساعة 6 الى 8 يذاكر الحاجات اللى بتتحفظ
6 - من بعد الساعة 8 ينام

وبكدة هيستوعب اكتر وهيقدر ينظم وقتة

بعدا اذنكم بقة عشان هدخل انام الساعة قربت على 8

تخيل اية اللى حيحصل بعد غرق الدلتا . الحياة تبقى عاملة ازاى . انا عن نفسى قعدت افكر فى الموضوع دة . تخيلت ان سطح البحر ارتفع متر ونص والمحلة الكبرى اللى انا منها غرقت . هنزل ازاى اروح الكلية اللى هى اصلا هتكون غرقانة هى كمان . طيب مش مهم الكلية . ام عبدة بتاع الخضار هتفتح ازاى وعم اسماعيل البقال . يعنى كدة كمان مش هنعرف نجيب الاكل . اصلا مش هيبقى فى اكل عشان المحاصيل كلها هتغرق . كمان الكهربا 

هتتقطع يعنى مفيش تلفزيون ولا انترنت ولا اضاءة . طيب الناس تعمل اية . انا وجدت ان احنا نقدر نصلح من درجة حرارة الجو لو كل واحد عمل اللى علية وبما ان ثانى اكسيد الكربون هو اللى عامل مشكلة الانحباس الحرارى . فمن الممكن نقلل نسبة ثانى اكسيد الكربون فى الجو بطرق بسيطة على سبيل المثال : 
1- نزرع الأشجار الخشبية فى بيوتنا وفوق أسطح البيوت و قدام البيوت وفى البلكونات والأشجار دى مش محتاجة رعاية خاصة وليها فائدة كبيرة جدا حيث تقوم بحفظ التوازن بين الأكسجين وثاني أكسيد الكربون في الجو عن طريق امتصاص غاز ثاني أكسيد الكربون من الجو من أجل إجراء عملية التمثيل الضوئي و إنتاج الأكسجين كناتج لعملية التمثيل الضوئي. وكمان ممكن تزرع نباتات عطرية فى البلكونة تعمل رائحة جميلة ومنظر حلو للبلكونة بدل ما تخزن فيها بصل والكلام دة مش مكلف خالص شوية طين وممكن تجيب شتلات من اى مشتل قريب 
2- كمان نقلل من استعمال العربيات ونروح الشغل بالبسكلتة زى الصين واوربا . المدير والموظفين هناك بيروحوا الشغل بالعجل بالرغم من ان عندهم عربيات . ودة مفيد جدا للصحة وبيوفر حق البنزين كمان وبيقلل من انتاج ثانى اكسيد الكربون . واستعمال العربيات يقتصر على السفر والمشاوير المهمة فقط مش اللف عمال على بطال فى الشوارع 
3- المدخنين يحاولوا يبطلوا ويلعبوا رياضة وياخدوا ادوية تساعدهم على الاقلاع عن التدخين 
4- نحاول نربى الاطفال من صغرهم على النظافة وحب البيئة ونوجهم للسلوكيات الكويسة . 
5- محدش يستهون بأى محاولة يعملها لأصلاح البيئة . ابدأ بنفسك الاول وبعدين شوف غيرك مش العكس 
وبكدة نقدر نقلل حوالى ربع نسبة ثانى اكسيد الكربون فى الجو لو عملنا دة

النهاردة ومن اربع ايام فاتوا الجو حر جدا ومليان غبار قعدت اسأل اية اللى عامل فى الجو كدة وعرفت فى الاخر ان دة من اسباب حرق قش الرز والولا ابن اختى جالة كرشة نفس والواحد مخنوق فعلا . الجو دة معطل خلايا التفكير فى مخى . طيب وبعدين الناس دى بتحرقوا لية طيب ما ممكن يرموة فى اى حتة اكتشفت ان الفلاحين ليهم اسبابهم يعنى مش بيحرقوة من غير سبب . طيب اية هى الاسباب ؟ 
1- يتخلصوا منة 
2- الجو يبقى حر عشان يمنع المحصول من الصقيع 
3- الحشرات اللى بتهدد المحصول تموت 
4- وان الحكومة مش عاملة خطة للتخلص من قش الرز 
5- بتساعد فى خصوبة التربة 

طيب الناس تعمل اية بالقش لو متحرقش . لقيت انا وبدور على النت حل للمشكلة دى . ان ممكن القش دة يستخدم ويتعمل منة 

1-علف للماشية 
2- يدخل فى صناعة الخشب 
3 - يدخل فى صناعة الكرتون 
4 - يطلع منة غاز طبيعى الفلاحين يستخدموة بدل الانابيب 

ودة طبعا هيقلل الاصابة بالربو والامراض التنفسية و هيمنع التلوث وهيشغل ناس ويجيب فلوس . 
والناس ممكن تعمل كدة بالجهود الذاتية من غير ما تستنى الحكومة او خواجة يجى يشترى القش دة .
ممكن كل عمدة فى قرية يجتمع بالمزارعين ويقولهم ياجماعة احنا نشترك ونعمل مصنع كرتون او خشب او علف ويشغلوا فية شباب القرية العاطل او يتفقوا مع وزارة البترول ويبعوهولها . حتى لو مش عشان الجو والناس عشان ولادهم ميتعبوش . الامراض كترت والناس مش ناقصة بدل ما ندفع الفلوس فى العلاج ندفعها فى الاستثمار والمحافظة على البيئة . نهايتاً حبيت اقول حلول ودى لينكات لبعض المشاريع اللى ممكن تتعمل : 

http://www.alkherat.com/vb/showthread.php?t=1422
http://www.eeaa.gov.eg/arabic/main/env_recycling_rice.asp
http://www.afkaaar.com/html/article135.html

والمطلوب مننا كمجتمع مدنى اى حد يقرا المقال بتاعى ومهتم بالموضوع دة وعايز يعمل حاجة يروح للقرى اللى جنبة ويحاول يقابل العمدة ويشرحلة والفكرة ويشوف يمكن يغير حاجة . انا نفسى كلمت اصحابى اللى فى القرى اللى جنبى ولكن للأسف كانوا حرقوا خلاص وملحقتهمش 

شكراً ليكم

ساعات لما بحب اتكلم مع حد ونتناقش عن موضوع معين . بفتح الموضوع ولما النقاش يسخن دايما اللى قدامى يغضب اوى ويبتدى يفرض رأية بدون مايسمع رأيى وميدنيش فرصة للكلام ويبقى متعصب جدا لرأية اللى هوة اصلا نابع من لاشىء . شوية تجارب خايبة هو عاشها بدون قراية ولا اطلاع ولما تحاول تقنعة بالمنطق يبتدى بقة يطلعك حمار ومش بتفهم حاجة وساعات كمان يبتدى يفتى فى الدين ويقولك دة حرام ودة حلال مع انة ولا قرا ولاسمع درس من شيخ مجرد تخمين شخصى بياخدة يخلية امر مسلم بية ودة خيبة ترجع من التربية من الطفولة لما طفل بيضرب طفل . أم الطفل المضروب غالبا تقولة روح اضربة ازاى يغلبك مش تقولة اشتكى للأستاذ او لأهلة او تعالى قولى لا طبعا لازم يضربة وياخد حقة وبكدة لما يكبر يطلع انسان عدوانى ياخد حقة بدراعة  لا يعترف بالطرق السلمية والدبلوماسية ويفرض رأية على المجتمع وميتقبلش اى رأيى تانى. بيلغى عقلة وبياخد الافكار اللى بتتجاوب مع طبيعتة العدوانية . ودة غالبا سمة سائدة فى الشعب المصرى والعالم العربى عشان كدة احنا (العالم العربى )  ملناش فى السياسة . كل اللى عايزينة ناكل ونشرب ونتجوز وبعد كدة اللى يولع يولع . على العكس من الدول الغربية زى امريكا والاتحاد الاوربى . انا عن نفسى لما بعمل شات مع اى حد من هناك نادرا لما بلاقى واحد متعصب قوى كدة زينا وكمان بيبقى متعصب على فهم وقراية مش هبل كدة  وخلاص . حتى لما بيرفض الحديث بيقولى لو سمحت متتكلمش فى الموضوع دة بدون انفعال ونبقى اصحاب عادى ومفيش مشكلة . هنا يقولك ياعم اقعد ساكت انت مش عارف حاجة . ودة اللى مخلى العرب بالمعنى العام عبارة عن بق على الفاضى بيتكلم وخلاص ومش قادر يتخلص من الهيمنة الغربية فى كل حاجة . كمان فى شخصية فى مصر اسمها شخصية ( ابو العريف ) تلاقية عارف كل حاجة فى اى حاجة معندوش تخصص بيفهم فى الكورة والسياسة والدين والطب والهندسة والحرف المهنية . حاجة تخلى الواحد يستعجب طالما احنا بالعبقرية الخطيرة دى لية مش بنتقدم لية مش عارفين نصنع حاجة بدل ما بنستورد فوانيس رمضان وسبح من الصين ودة بيخلينى احس ان المجتمعات العربية بقت مليانة عقد نفسية 

اخر حاجة استفزتنى الخميس اللى فات من بعد امتحان الادارة اللى كان طويل. زيارة اوباما واهتمام الناس المبالغ فية دة انا اول مادخلت من الباب امى قالتلى شوفت خطاب اوباما وبعدين سألتنى على الامتحان 

زى مايكون اوباما دة اللى هيجيب الديب من ديلة وقال اية نفتح صفحة جديدة طيب المسلمين اللى بيموتوا فى افغانستان وباكستان سيبك يا عم نفتح صفحة جديدة  طيب واللى بيموتوا فى العراق انت مش قولت هنسحب القوات يقولك لا دة احنا بندرب البوليس العراقى عشان لما نمشى يعرف يدافع عن نفسة يعنى قدمنا 3 سنين كدة عشان ندربهم اما بالنسبة لفلسطين لازم بقة حل الدولتين دة لو اسرائيل وافقت

يعنى كمان الارض تبقى بتعتنا ونستأذن المحتل عشان يسبنى نعيش هقول اية مهو العرب دول اصلا شوية هفقات محدش يقدر يفتح بقة وكمان لازم نزبط القواعد العسكرية فى الخليج عشان ايران متمتلكش نووى اما لما كان صدام حسين عندة نووى وكان عايز يرجع الكويت اللى هى اصلا جزء من العراق فى الاصل لازم العرب كلهم يحاربوة عشان ينولوا الرضا من اسيادهم عمتا دة رد فعل متوقع لأن الغرقان بيتعلق بقشاية بس احب اقول ولا اوباما ولا غيرة هيقدروا يعملولنا حاجة لازم احنا اللى نبتدى نشتغل ونزرع الصحرا ونعمل اكتفاء ذاتى من القمح والمعونات اللى بنشحتها من امريكا ونشغل البطالة اللى فى مصر ونصنع منتجاتنا بدل منستورد بكدة يبقى لينا كلمة مسموعة انما لو فضلنا كدة يبقى موت يحمار اقعد صرخ وابقى قابلنى لو حد سمعك